por Rifat Birmizrahi

Los aksidentes de la luvya de lunes ultimo:

      Damos algunos detalyos sovre los aksidentes de la fuerte luvya de lunes ultimo.
Partikularmente en las guertas, el pipino lo aranko del kyok, el karpus lo izo topus, el sheftali i el kayisi los izo yasi, i ala uva la izo bova.  Kuanto en las kazas, en akea ke avia ventanikas bashas, las kashas i las tinajas baylaron polka, i el patin se metyo hashlama por sesh mezes.  Si keremos avlar por las banketas de djuguar, fue grande desgrasya.

      Todas las djuguaderas estavan kon empushos de ver la fuerte luvya i no tenian gana de travar la punta de la karta.  Lo ke ay de kuryozo es ke, espantadosen de una nueva luvya, no se estan indo a djuguar, i se kalkula a munchos miles de groshes, los danyos de los fikim.  El tavan ke no mos trayga mas en esta preva en zahut de nuestras djuguaderas.