por Rifat Birmizrahi

Proverbos:

• El ombre altiguozo tyene pokos amigos, syendo por su altigueza todos se aleshan de el.
• El jenerozo eskapa de la muerte kon la tsedaka, i el eskaso eskapa dela tsedaka kon la muerte.
• El amor de la moneda aze syegar los ojos, el es mas ondo ke una mar sin fondo.
• Bushkar dadiva del eskaso komo echar red en el pinyasko.
• Todos los ombres adoran a un solo Dyo; ma el ambisyozo de moneda, a dos.
• Mas vale un guevo oy ke syete poyos manyana.
• Mas profita la persona dela enimistad delos selozos ke de la amistad de sus admiradores.
• Mas vale una chosa en despyerto ke kastelyos i palasyos entre suenyos.
• Mas vale bever agua de pozo kon repozo, ke vino kon ansya i tristezas.
• Mijor es komer vedruras kon siguredad, ke karne godra kon perikolo.
• Mijor es morar en chosa en kompanyia de djente alta, ke en palasyos kon djente basha.
• Maldisyon de selozo no alkansa i bendisyon de ipokrites (hanefes) no syente el Dyo.
• No kamines komo el syego kon los ojos tapados por imitar ansi a tus kompanyeros.
• Fraguar kaza kon moneda de otros es arekojer pyedras para fraguar la tomba.
• Kuanto mas puja la rikeza, mas mengua el repozo.
• Rezervate de resivir dadivas de ipokritas, por ke eyos no dan uno si no toman syete.

• Un elevo de eskola demanda a su padre:
  Papa ke diferensya ay de un ombre sivilizado a un ombre barbaro?
  Ay!  Mi ijo esto es muy kolay.  El ombre sivilizado mata a su enimigo a sesh mil metros de leshura kon una yulle de tiro i el barbaro le rompe la kavesa kon un lenyo.
• Marido i mujer:
  Una mujer vyendo ke su marido eskupyo en el ayre le demanda:  Ke estas azyendo?
  Ah! Parese ke no meldates los avizos ke por kavza de ijyen (limpyeza) es defendido de eskupir enbasho, i es por esto ke yo eskupo en el aver.
• Una mujer feya dizia a su ijo ke yorava:
  Mi ijo, no es bueno ke yores syendo te se aze feya la figura.
  Kale seya mama, ke tu en tu chikes yorates muy muncho.