Make your own free website on Tripod.com
Archivo |
MuestraLingua
El Enstruktor Nš 25
20 Tishri 5649 - 1889

por Rifat Birmizrahi

LAS POSTAS

      La posta, regularmente organizada, data del tyempo de LUI XI, rey de Fransya.  Ma ay poko tyempo ke eya tomo el rolo konsideravle ke eya okupa oy en las relasyones de la famiya, del komersyo, dela vida de los puevlos.

      Todas las djuguaderas estavan kon empushos de ver la fuerte luvya i no tenian gana de travar la punta de la karta.  Lo ke ay de kuryozo es ke, espantadosen de una nueva luvya, no se estan indo a djuguar, i se kalkula a munchos miles de groshes, los danyos de los fikim.  El tavan ke no mos trayga mas en esta preva en zahut de nuestras djuguaderas.  Antes de la grande reforma del 1840, en Fransya, una letra semple, de Marsilya a Paris, pagava un franko i vente santimos.  Oy, la taksa es de 10 santimos por el enteryor dela Fransya.

      La reforma fue mas muncho remarkavle por las korespondensyas kon el estranjero.

      Una letra semple de Londres a Paris pagava dos frankos; de Londres a Djibraltar 3 frankos i 60 santimos, al Ejipto, 3 frankos i 85 santimos; a Los Estados Unidos o al Kanada, 5 frankos.

      Oy, una letra por ir de Londres a Paris, a Moskova, al Kayro, a Nu-York, a Buenos Ayres, paga 25 santimos.  Komo se realizo esta ovra de progreso?  Pokos de nuestros liktores lo saven.

      Enel 1832, un filozofo Inglez, Sinyor KULRIDJ, se paseava en la puerta de un alberga (otel de kampanya) dela chika sivdad Eskoseza de Kisbek, kuando el vido vinir al faktor de las postas, ke se detuvo i yamo sovre el portal a una syerva de la alberga.
Na vuestro shilin, faktor, i remeted la letra a esta muchacha.
La syerva regrasyo al viyajador de esta favor, ma eya adjunto:
Vos izitesh un gaste inutil; mirad, esta letra ke no kontyene otro ke unas pajinas blankas, yo puedo atorgarlo, a vos ke vinish de mostrarvos tan bueno; yo so uerfana i no tengo serkano paryente ke mi ermano ke es militer en Garnizon enel sud.  Nozotros imajinimos un medyo de darnos novedades sin nada gastar de nuestras flakas ekonomias.  Ansi, el me embiya una letra ke no tyene otra eskritura afuera de la aderesa.  Ma nozotros nos metemos de akordo sovre syertos sinyales ke
se mesklan kon la eskritura del adereso i ke me dizen ke mi ermano se topa bueno.

      KULRIDJ, topo el envento muy enjenyozo, i sin nombrar el lugar ni la persona, el publiko este echo en los jurnales.

      En este momento, vijitava la Eskosya un publisista nombrado Rovland-Illel, ke ya se avia sinyalado kon unas reformas sovre la manera de ensenyar en las eskolas.  Rovland-Illel, penso sovre el echo ke rekonto sinyor KULRIDJ en los jurnales, i se okupo de topar unos medyos, por reformar el servisyo de las postas.

      El propozo una taksa de un peni (10 santimos), i pagavle de antes kon tembros vendidos al publiko ke los apegara sovre la letra a ekspidir.  Ma kalia azer adoptar esta reforma; Rovland-Illel, lucho kon una grande enerjia, kontra el selo i las ideas yerradas.

      En fin, la reforma fue adoptada i promolgada enel 17 de Agusto 1839.  La ovra fue metida en egzekusyon en el 10 de Enero de 1840;  Ma Rovland-Illel tuvo de sufrir toda sorte de umiyasyones; no lo admetyeron al ministeryo de las postas ke komo ayudante por dos anyos solamente, i kon una paga mizeravle

      Dospues de dos anyos le dyeron paso, i sin ninguna rekompensa.  Esta endjustisya endinyo el pais, ke ofrisyo una suskripsyon 345.000 frankos komo rekompensa nasyonal.

      Enel 1846, sinyalaron al parlamento syertos desordenes dela posta, ke izyeron yamar de nuevo al reformador.  El fue nominado alora sekretaryo jeneral, i pudo ansi asigurar el sukseso de su reforma.  El parlamento le voto 500.000 frankos de rekompensa, mas el titolo i la paga de sekretaryo jeneral por toda la vida itas" itas".  De todas las partes del mundo el fue inchido de onores i de markas de agradisimyento.  Kuando el muryo, enel 1879, ala edad de 84 anyos, lo enteraron enel Panteon Inglez, en Vestminster, onde son enterados los mas ilustres personajes dela Ingleterya.