Make your own free website on Tripod.com
Archivo |
MuestraLingua
El Burlon Nş 39
20 Heshvan 5670 - 4 Novembre 1909

por Rifat Birmizrahi

No tengash ilaka kon gazeteros:

      Keridos lektores:  Yo vos digo ke no tengash ilaka kon gazeteros, porke so vuestro amigo, i aun ke yo so tambyen gazetero, tengo la alma un poko piadoza, i esto es porke so ainda, fresko gazetero (yeni çikma komo mos yaman en Izmir), aun ke pasi mi tyempo, en mi chikes a eskrivir algunas kozikas a syertas gazetas.

      Antes de todo vos dire komo se aparta un gazetero, del resto de la djente.  El es ordinaryamente, godro i basho, flako i alto, tyene o no antojos, pero i syempre es avlaston, lo veresh kontinualmente avlando de kozas ke no konose, ni ke tuvo konosido ni ke va konoser, el ke tyene las aldikeras yenas de havadizes.

      El se mostra enformado de todo lo ke egziste i de lo ke no egziste, de lo ke se paso ayer i de lo ke va arivar manyana.  Traelde una novedad de antes dos diyas, el vos dira ke ya la konose dizde anyos, i si le dizes ke se yerro, la repuesta ke vos da es: ke vos no entendesh loke el kere dizir.

      Syempre lo veresh mirando por todas las partes, vos parese ke el esta bushkando enformasyones?  Del todo!  Es por mostrar ke:  Yo so gazetero.  El mira semplamente por onde ay de ganar, onde ay moneda...

      Si algun diya vos kombida kon el de ir ala lokanta, no vayash, syendo aun ke el vos kombido, es vos ke vash a pagar la nota dela komida.

      Por ganarse la amistad, el gazetero vos da un bilyeto de teatro debaldes (syendo ke i el lo tomo debaldes), guay de vos si akseptash su regalo, mas el no vos desha la yaka, el vos ovligara ke lo yevesh akurute, alas lokantas debaldes (debaldes para el, ma no para vos), vos le trataresh birras.  Lo yevaresh a paseos, kale ke le desh moneda para avizos, ke no vos traye otro, ke klientes, mandados por el, i ke no toman nada.

      Syempre vos devesh atorgar delantre la djente, ke el jurnaliste vos aze plazeres.

      Pero el tyene una koza de buena, si tenesh algun artikolo, de darle para publikar en su gazeta, i si el redaktor es vuestro entimo amigo, el mas avyerto no vo lo pasa nunka debaldes, i a kavza de vuestra amistad, se kovra de vos, un poko mas de loke se kovreria de otros klientes.

      I otra una de buena ke tyene es:  ke eyos no publikan nunka novedades freskas, si no ke novedades konosidas por todos vozotros.

      Mezmo, keridos lektores, kreo ke este artikolo, ya era konosido de todos vozotros, de esto toma la prova.