Make your own free website on Tripod.com
Archivo |
MuestraLingua
El Burlon Nš 3
26 Kislev 5669 - 20 Desembre 1908

por Rifat Birmizrahi

Konsejos para azer rikos:

      Kontan ke el defondo baron de Rochild uno de los mas rikos ombres del mundo teniya apegados en las paredes de su banka los konsejos sigientes i el tenia uzo de dizir a sus amigos ke si el se izo tan riko i tan kontado en el mundo es porke penso syempre a estos konsejos.  Meldaldos aki abasho keridos lektores i si puedesh, profitad de eyos i azedevos rikos komo Rochild:

  • Azed atansyon kon mucho kuydado a todos los detalyos de vuestro echo;
  • Sied prestozo en todo lo ke azesh;
  • Todos los echos egzaminaldos byen i pues pensad siguramente sovre loke aresh;
  • Tened el koraje de ovrar djusto;
  • Sufrid todos los males kon pasensya;
  • Espantadvos de ovrar negro;
  • kombatid bravamente por adelantar en la vida;
  • No frekuentesh las djentes visiozas (negras);
  • Konsiderad la onestedad komo koza santa;
  • No danyesh a la fama i a los echos de los otros;
  • Apretad mano solo delas djentes buenas i vertuozas;
  • Aleshad vuestro esprito delas ideas negras;
  • No avlesh mintira en ninguna okazyon;
  • Azed pokos amigos, ma buenos;
  • Nunka bushkesh a mostrar mas delo ke sosh;
  • Tened buenas manyas;
  • Pagad vuestras devdas presto i sin azer ir i vinir al devdor munchas vezes;
  • No pruntesh a un amigo si lo ke el vos avla es verdad;
  • Respektar el konsejo de vuestros paryentes;
  • Gastad moneda i no la onestedad;
  • No tokes ni gostes ninguna bevyenda danyadera;
  • El tyempo onde estash libre, emplealdo para mijorear vuestra situasyon;
  • No pizesh al portal del negro;
  • Azed a todos un saludo amistozo;
  • No vos deskorajes nunka;
  • Lavorad syempre por lo derecho i vozotros reushires siguramente;