por Rifat Birmizrahi

El Djudyo es harrif:

      Ay en el mundo una sorte de djente ke no tendyendo ningun ofisyo, ni ninguna okupasyon no topan nada de mijor ke de atakarsen kon los otros, de pelearsen kon ke topan si mesmo estos son djentes sin kulpa i sin pekado.

      Ansi mozotros djudyos no bushkamos de azer ningun mal a dinguno, bivimos repozados i portanto ay djentes ke penan kon todas sus unyas por azermos kuanto mal puden.  Estas djentes se yaman antisimites.

      Un diya uno de estos dezmazalados antisimites akompanyado de un azno arivo a Selanik i komo no era muy riko el abasho a un chiko otel, pero el se ensanyo mucho en entendyendo ke el patron del otel onde el avia arivado era un djudyo Selanikli, uno de akeyos finos djudyos ke se djugan de la maymuna mesmo.  Pero nuestro antisimita kijo divertirse un poko kon el oteldji i yamandolo, el le disho:
Syente djudyo, yo lo ke tengo es un grosh, kero ke kon este kadar de paras me des una koza ke me pueda artar a mi, dar a komer a mi azno i kuando mas tadre me dara un poko de ambre ke pueda entonses tambyen komer alguna koza.
Alesta sinyor! Disho el djudyo i el koryo afura en riendose entre los muchos.

      No paso un punto, el retorno kon un grande karpus en la mano, un karpus kalavasudo mas ke la kalavasa.
Tomad esto, disho el oteldji al antisimita.  Esto es loke vos konvyene.  El karpus vos komesh agora i ansi vos artaresh komo se deve.  Las kashkaras, dash a vuestro azno i kuando mas tadre vos da un poko de ambre puedesh komer las pipitikas...

      Ken la gano el djudyo o el antisimta kalavasudo?