por Rifat Birmizrahi

Porke fue fraguada la kiz kulesi:

Egzisten dos kuryozas liendas (konsejas) sovre la manera ke fue fraguada la "KIZ-KULESI", la kuryoza kula ke se topa enmedyo de mar en el Bosforo (Bogazichi).  Las vamos a kontar aki todas las dos.

La primera se paso en el tyempo onde los Turkos no avian arivado ainda a EOROPA i onde los Gregos podestavan sovre Kostantinopla.

      Un emperor Grego, tenia una ija donde la grande ermozura avia solevantado el selo i la aboresyon de sus ermanas i de todas las mujeres del harem del emperor.

      Un dia, algunas zinganas entraron al palasyo.  Una de eyas renkontro ala joven i ermoza prensesa, ma no savyendo ken era, la zingana le ensenyo ke eya muryera a la edad de dyes i ocho anyos mordida por un kulevro.  Este endivinamyento empresyono tanto a la chika prensesa ke eya kayo gravamente hazina.

      Su padre avyendo embezado la razon de las sufriyensas de su ija, desidyo por repozar su espanto, de azer fraguar una tore enmedyo del Bosforo i de meter ayi a su ija kerida asta la epoka fatal anonsada por la zingana.

      Se fraguo dunke sovre el banko de safra de Eskudar (Üsküdar) la famoza tore nombrada KIZ KULESI i dizde la edad de kinze anyos la joven prensesa fue enserrada ayi kon muchas de su kompanyeras ansi ke algunos servidores eskojidos entre los mas fieles.

      Kuando la epoka ke sigun la profesia dela zingana devia traer la fin dela joven prensesa arivo, se topo entonses ke un joven poeta ke traversava el Bosforo serka dela kula en kuestyon, kayo amorozo kon lokura dela joven prensesa ke el avia visto arimada en el balkon de la kula.

      Desidido de enformar a la ija del emperor del amor ke el tenia por eya, el se ayego un dia muy serka de la kula i depozo ayi un godro buketo de flores, entre los kualos el avia plasado una poezia ke el avia kompuesto por deklarar su buyente amor por la prensesa.

      Esta ultima ke de su ventana avia visto lo ke izo el poete espero ke partiera i a punto ke se alesho un poko, eya koryo tomar las flores ke el avia depozado.

      Apenas las avia eya tomado i empesava a goler las dulses parfumes, ke una chika kulevra saltando del buketo la mordyo fuertamente en el braso derecho.

      Las kompanyeras dela prensesa i todos sus sevridores echaron a punto grandes gritos i se mostraron fuertamente espantados del terivle aksidente, en el kual mostrava ke eyos no avian surveyado bueno la prensesa, i kuando el emperor lo supiera, todos eyos serian matados.

      El poeta ke sin kererlo avia okazyonado todo esto, sintyo los gritos echados por el entoraje dela prensesa i malgrado la pena de muerte ordenada kontra todos akeos ke entraran en la chika isla onde se topa la kula, el dirijo ayi su barka vivamente i no tuvo pena a entrar grasyas al dezorden ke reynava entre los moradores.

      El se rondjo para la joven prensesa ke se topava entonses dezmayada i aferrandole el braso modrido, el apliko sus lavyos kon pasyon sovre la chika yaga, chupando kon fortaleza la sangre ke salia de eya.

      Kuando la prensesa se vino en si, eya vido su amante a sus rodeyas, las miradas mojadas por dulses lagrimas, la figura resplandesyente de grande amor.

      El emperor fue a punto enformado de loke se avia pasado i kuando el se ambezo ke el akontesimyento - ke se avia produsido djusto en la epoka anonsyada por la zingana - avia sido aleshado por el amor del poeta, el no ezito a kazar a su ija kon este ultimo, el kual por salvar ala prensesa no avia ezitado a meter su vida en perikolo.

Sintid agora la sigunda lienda ke egziste sovre la fragua dela KIZ KULESI.  Eya se paso en el tyempo onde los Otomanes podestavan sovre Kostantinopla.

      Un sultan se avia sonyado ke su ija muryera dela modridura de un kulevro.

      Los endivinos i los estreyeros sovre el molde de prezervar ala prensesa de la desgrasya ke la menasava, no toparon nada de mijor ke de konsejar al sultan de azer fraguar una kula enmedyo de mar.

      Sintyendo sus konsejas, el soverano izo fraguar la KIZ KULESI.  La joven prensesa fue enserrada en esta kula kon muchas ijas de su edad destinadas a tenerle kompanyiya.  Un dia ke entornada de sus servidoras, eya estava asentada en la puerta de la kula i se divertia a mirar las barkas ke paseavan.  Eya remarko en la kuala se topavan frutos manyifikos i partikularmente uvas ke le dyeron grande dezeo.

      Malgrado la defensa del sultan ke avia ordenado ke no desharon merkar nada direktamente a su ija, eya demando ke le tomavan de estas uvas ke tanto le gustavan.  Una kuedra fue rondjada asta la barka i un paniri de uvas atado fue traido ansi asta la kula.

      Pero, apenas la prensesa metyo la mano por gostar delas frutas ke un kulevro salto del paniri i la mordyo en la kara.  Malgrado todos los kudyados ke le fueron muchiguados, la joven prensesa no tardo a murir.

Esto prova ke la persona no puede eskapar de su mazal.