por Rifat Birmizrahi

A PROPOZITO DE LAS KALORES:

      Este anyo, nozotros sintimos fuertes kalores en Konstantinople i en syertas otras sivdades de Turkiya.  Ma kuanto fuertes ke eyas nos paresen, eyas no son nada en komparasyon de akeas ke reynan en diversos paises del mundo.  Nozotros no tuvimos, en Konstantinople, mas de 32 o 33 grados de santigrado, en la solombra.

      Asiguran ke no ay lugar sovre la tyerra onde la kalor es mas grande en verano komo las montanyas de Tibet, onde el termometro, en la solombra, no marka menos de 52 grados reomur (kaji 20 por syen mas del santigrado).

      En el senegal i en la Guadelop, el alkansa a 44 grados; en Persya 41; en Kalkuta i en la Amerika santral, 40 grados; enel afganistan, la Abisinya, i los disyertos dela Afrika 34; en Gresya i en Arabia el suve ordinaryamente a 32 o 34 grados.  Enel Kanada i en Nu-York, el no pasa de 31 grados.  En espanya, en la India, en la Algeria, en Kina, tyenen 30 grados; en Danimarka, en San Petersburg, en Shangay, enel emperyo de Birmanya i en Fransya, el es kaji de 26 grados.

      Estas unas temperaturas markadas en la solombra i ke se produsen kaji syempre en los paizes ke nozotros vinimos de sinyalar.  Por tanto, arivan unos veranos onde las kalores alkansan a unos grados mas elevados.

• En el anyo 627 ala era kristiyana, la kalor seko los rios i los manaderos de agua, i un grande numero de personas muryeron de sed.
• Enel 879, no pudyeron kultivar los kampos, tanto el suelo (la tyerra) era kemado por los rayos del sol.
• Enel 993, sigun las kronikas de akel tyempo, los lugumbres i las yervas eran tostados a tal punto ke eyos eran amarios komo un pan kocho enel orno.
• Enel anyo 1000, vyeron los rios sekados a tal grado ke los peshkados muryeron i sus potrifaksyon endjentro numerozas epidimias.  Kreyeron entonses ke la fin del mundo era muy serkana.
• Enel 1332, el grande rio Ren (entre la Fransya i la Almanya) estuvo seko durante munchos mezes.
• Enel 1705, devino emposivle de salir de kaza afuera a medyo dia.  La atmosfera paresia un orno de kristal.
• Enel 1779, munchas personas fueron esfiksyadas (se aogaron) en las kayes, tanto el aver avia devinido irespiravle.

Diversos:

• Sigun una istatistika echa ultimamente, kada abitante de Paris konsome al anyo, en medyana (uno sovre otro):
  
  
  • 191 litras de vino.
  • 75 kilogramos i 198 gramos de karne.
  • 9 kilogramos i 260 gramos de peshkado.
  • 10 kilogrames i 883 gramos de gayna i otra aves.
  • 2 kilogramos de ishkembe.
  • 8 kilogramos i 328 gramos de azete.
  • 2 kilogramos de kezo.
  • endesparte de esto 158 uevos.
  
  
• En Londres, kapital dela Gran Britanya, onde se topan unas rikezas imansas, kontan agora mas de 80 mil povres.  Ma povres enel yeno entendimyento del byervo.  Eyos no tyenen ni pan para komer ni lugar para abrigarsen.
  
        I dizen ke en esta mezma sivdad se topan fortunas kolosales, komo el duke de Vensminster ke tyene 120 frankos de revenido al segondo.
  
  
• Savesh kuantos jurnales poseda la Amerika?  El numero total de las publikasyones periodikas es de 15420 i el tiraje de todos es de 30.165.200 numeros despartidos ansi:
  
  
  • Semanales 17.946.250
  • Mensuales 6.058.250
  • De kada dia 4772500
  • Dos vezes al mez 796.750
  • Dos vezes ala semana 224.000
  • Tres vezes al anyo 193.250
  
  Son los jurnales ke aparesen una vez ala semana ke tyenen mas fuerte tiraje.
  
• La populasyon aktual del Kanada i de los estados unidos es de 65 milyones de personas, o, en kontando sinko personas por famiya, de 13 milyones de famiyas.  Sigun el kuento ke mostrimos kere dizir ke ay dos efemplares i medyo de jurnales por famiya.
  
  
• Las populasyones de la Amerika del Nord tyene abitos de lektura mas muncho ke las otras nasyones.