Make your own free website on Tripod.com
Archivo |
MuestraLingua
El Enstruktor Nš 4
22 Iyar 5648 - 1888

por Rifat Birmizrahi

LA GAZETA

      En la biblioteka de Viyana se topan vente i ocho koleksyones de manuskritos de gazetas politikas ke fueron merkadas dela famiya "Fugir" de Ogsburg por una suma de 15.000 Frankos.  Este jurnal rekonta kronikas empesando del 1565 al 1604.
La famiya "Fugir" era muy respektada enel 15en sieglo.  Eya azia un grande komersyo en la India, enel oksidente i enel oryente i tenia adjentas en todas las sivdades komersiyales.  La kaza prensipal era Ogsburg.  Esta famiya tenia enformasyones de todo lo ke se pasava enel mundo komersial i politiko i es soto su direksyon ke empeso a ser publikada una gazeta en lingua Almana.  El kontenido de esta gazeta no atirava los lektores, porke la mas parte konsestia en anonsos de komersyo ke eran eskritos en lingua Ingleza, entonses la lingua del komersyo.
  En vezes eran publikados en esta gazeta algunaos artikolos eskritos en Franses i en Espanyol, poezias i versos satirikos.  Esta gazeta se vendia a 4 krasares la oja.  El abonamyento era 14 Florines al anyo por la edisyon ordinarya i la edisyon ekstraordinarya 14 Florines i 4 krasares.

      En estas koleksyones se topan kaji mil letras de Turkia ke tardaron de arivar de Konstantinopla a Viyana myentres 40 o 50 diyas.  Topan ayi tambyen letras de Amerika, dela India oriyantal, dela Persya, del Japon i dela Kina.  Ay tambyen artikolos de literatura, poezias, satirikas itas.

      En esta gazeta ay los detalyos de una grande fyesta ke fue dada en Praga.

Aparejaron:

50 korsos,
1300 karneros,
1500 pasharos,
200 uevos,
500 gayos,
5000 gayinas,
1300 patos,
50 pyernas de puerko,
17 kintales de karne,
7000 fontes de peshkado,
5 tonalitas de sadyangoz,
318 botas de vino
i 170 botas de agua ardente (raki)

      El tyempo aze aserkar a lo leshano, deskuvrir lo enkuvyerto, abashar lo alto i elevar lo basho, anchea lo estrecho, alivyana lo pezgado, aze lo emposivle posivle.

      Kuando se propenyeron de fondar la gazeta "Algemany Zaytung" en Ogsburg, el selebre poeta Almano SHILLER avia dicho enel konsilyo munisipal ke  "Sigun el, no avian a topar bastantes sujetos por inchir ni la mitad de la oja al dia."

      Agora se publikan enel mundo 34.574 jurnales ke tiran 10.600.000.000 eshemplores.  De estos jurnales 18.797 se publikan en Eropa, 13.009 en Amerika, 775 en Asia, 661 en Ostralya, 232 en Afrika,. 16.500 son eskritos en Inglez, 7.800 en Almano, 3.850 en Franses, 1.600 en Espanyol, i el resto en otras linguas.  El jurnalismo esta indo i desvelopandose kada dia.  En la lingua Ebraika tambyen se publika agora tres jurnales kotidyanos (de kada dia) i 4 o 5 semanales.

      Enel 1826 kontavan solamente 3116 jurnales, i agora despues de sesenta anyos, kontan kaji 35.000.  En Amerika kontavan en esta data 978 jurnales i agora kontan 13.000 !!  Ke grande progreso!

      En la amerika del nord kontan un jurnal sovre 5.500 abitantes.  En la Esbichera sovre 6.000, en Almanya i en Fransya sovre 14.000, en Ingletera sovre 16.000.

      Los jurnales semanales ke se publikan enel mundo entero tiran 50 milyones de eshemplares.  Los jurnales los mas espandidos i los mas afamados son los jurnales Inglezes ke tyenen un fuerte tiraje al dia i se venden a un presyo muy barato.  Las prensipales entradas son los anonsos.En los jurnales Inglezes ay longas korespondansyas de todas las partes del mundo, porke es del karakter de los Inglezes de kerer ser enformados de todo lo ke se pasa enel mundo.

      Los grandes jurnales Inglezes son espididos en trenos espesyales del kamino de fyerro a medya noche por las sivdades de las provensyas.  En mezmo tyempo ke los jurnales son distribuidos en Birmingam, son distribuidos en Londres.

      En Londres aparesen unos jurnales ke tratan solamente de novedades de una sola parte de la sivdad onde se publika el jurnal, komo de eskuelas, de echos de famiya itas".  Semejantes jurnales se topan en Ingletera solamente.