por Rifat Birmizrahi

ALOS LEKTORES:

      Dospues de aver konsakrado mas de tredje anyos, los mas presyozos de mi vida, a la publikasyon del jurnal "El Telegrafo", yo me topi en la nesesitad de separarme de el.  Mi triple dever komo ombre, komo patriota i komo Israelita me komandava de travajar, kon esta publikasyon, por el byenestar i el progreso de mis korelijyonaryos del empero Otomano, fideles sudetes de su maestad emperyal el sultan.  La lojika i mi konsesya no me permetyeron de sedir delantre las amenazasas ide neglijar este dever sagrado por sovreguardar mis enteresos personeles.  Yo preferi abandonar este jurnal ke me kosto tantos anyos de travajo, de lagrimas i de prevasyones de todo sorte; yo me desidi a prevarme de la rasyon (tahin) de pan, ke yo resivia de este jurnal por no mankar a mi dever, por no vender la kaoza de mis korelijyonaryos, ke es tambyen la kaoza de mi pais, de mi patria.

      Ma si yo rompi kon el jurnal "El Telegrafo", yo no rompi por tanto ni kon mis prensipyos ni kon mi habito de bivir del travajo entelektuel.  Los djustos prensipyos son enmotavles (no se trokan) i es muy difisil kaji emposivle, de disraegar un habito ke mantyenen myentres vente anyos.  Keryendo dunke ganar mi pan en mesmo tyempo ke ser de alguna utilidad por el publiko Israelita de este pais, yo emprendo agora la publikasyon del "Enstruktor" ke es una revista siantifika i literarya.  El kampo dela sensya i dela literatura es muy vasto, imanso, i ay de rekojer ai munchas flores oloryozas, munchos frutos delisiozos i salutaryos por ofreser alos djudyos de Turkiya.

      El verdadero byenestar de los ombres se topa, enmankavlamente, en la enstruksyon.  Es kon la enstruksyon ke el ombre ayega a posedar la mas presyoza konosensya, la konosensya de si mezmo, i a relevarse a sus propyos ojos.  Kontribuir a la propagasyon (espandimyento) dela enstruksyon entre los ombres, es travajar por el byen del pais, dela patria, dela umanidad entera; van mesmo asta dizir ke es kolaborad (ayudad) ala ovra dela providensya divina (ashgaha alkit) ke dezea el perfeksyonamyento del jenero umano.

      El savyo rey Shelomo no egzajero en prezentando en sus aforismos (Mishle), la sensya komo la konfidente i la favoresida de Dyo.

      Avrir delantre los ojos de los ombres el gran livro dela natura, azerles ver las maravias dela kreasyon, el kuryozo mekanizmo del universo, ez azer naser onde eyos la idea de la egzistensya de un ser soprimo (dyo) todo potente.  Rekontarles la istorya de los puevlos ke bivyeron i ke biven ainda sovre nuestro globo, eksponirles las kaozas de sus grandor i de sus kaida, darles los eshemplos de bravura i de kuardes, de jenerozidad i de basheza, es ensenyarles la manera de apartar el byen del mal, konvenserlos ke egziste una moral universal, una djustisya divina.  La sana kreensya (emuna) en un dyo i la moral pura, son los rezultados naturales dela enstruksyon.

      La ignorensya es, al kontraryo, el manadero del mal, la madre de los krimines.  O, komo disho un savyo autor:  La ignorensya es la mas grave enfermidad del jenero umano.  Es emposivle ke en la ignorensya ayegan a azer una sana apresiyasyon del mundo, a azersen una idea djusta de la potensya divina.

      El savyo rey Shelomo izo, en pokos byervos, el kontraste (diferensya) entre la sensya i la ignorensya.  El metyo estos byervos en la boka dela sensya:  "Akel ke me topa, topa la vida i se atira la favor de dyo; ma akel ke me ofensa, aze danyo a su alma; todos los ke me aborresen aman la muerte".

      Espandir la enstruksyon entre los ombres, es dunke no solamente un akto de byenfezensya ma tambyen un akto de piyadad.

      Yo tuve syempre en vista esta verdad ke yo no kedi de predikar myentres tredje anyos.  Agora tambyen, en fondando el Enstruktor, yo travajare por azer konoser esta verdad a akeyos ke no la konosen.  Yo me konsiderariya venturozo si kon esta publikasyon yo puedia ser de alguna utilidad por akeos ke travajan por el revelamyento moral i entelektual de los Israelitas de Turkiya.

      Si Dyo me permete, yo travajare kon la mesma ardor i kon el mesmo zelo de antes.  Mil grasyas al Dyo.  Nada no izo amenguar la kalor de mis sintimyentos.  Yo no ekonomizare los sakrifisyos menesterozos por render esta publikasyon util i agradavle en mesmo tyempo.  Are todos los esfoersos porke eya sea enteresante para todas las klases dela populasyon djudia de este pais, alos ombres i alas mujeres.

      El programa del "Enstruktor" komprendera las matyeras siguentes:

• Matyeras siyantifikas i litereryas.
• Biografias de personajes ilustres.
• Kuentos istorikos.
• Relasyones de grandes viajes.
• Konosensyas utiles.
• Romansos enstruktivos i morales.
• I mas otros sujetos diferentes.

      Yo rogo a los ombres enstruidos ke se topan entre nozotros de kerer bien onorar el "Enstruktor" de sus kolaborasyon.  Ma yo devo prevenirlos tambyen ke la preferensya sera dada alos artikolos konsernando el Djudaismo, porke "El Enstruktor" syendo echo para los djudyos, el deve tener un karakter djudyo.  Avra mesmo lugar rezervado para las produksyones litereryas eskritas en Ebraiko.

      Yo konto muncho sovre la partida entelijente i aklarada dela populasyon djudia de la kapital i de las provensyas ke kerera byen dar a mi ovra el enkorajamyento moral i materyal donde eya tendra menester por ser sostenida.  La juventud alumbrada i amiga del progreso no mankara eya tambyen; tengo la firme esperansa, de prestar su konkorso por el sukseso de este periodiko.  Yo espero de sus byenvolensya ke no solamente eyos se abonaran ma ke tambyen prokuraran al Enstruktor un buen kontenjente de suskriptores entre sus amigos i konosensyas.  Si "El Enstruktor" tyene un buen numero de abonados el puedria apareser dos vezes ala semana i resivir kada dia nuevas perfeksyonamyentos.

      Yo rogo a Dyo de meterme en estado de ser syempre util ala umanidad, i de servir mi patria i mi sovirano, el manyenshmo monarka sultan Abdul Hamid, protektor de las sensyas i de la libertad de los kultos, ke kudya kon una biva solisitud por el byenestar i el progreso de todos sus suditos.  Soto su reyno gloryozo los artes i las sensyas empesan a floreser i los benefisyos de la enstruksyon se espanden sovre las populasyones de su vasto emperyo.

      Yo me meto dunke a la ovra envikando la ayuda de Dyo.

DAVID FRESKO