Archivo |
MuestraLingua
El Telegrafo, edisyon de martes Nš 1
19 Sivan 5652 - 14 Junyo, 1892

por Rifat Birmizrahi

Enjeksyon de sangre de preto:

      Saven lektores i lektoras, en ke konsiste la nueva vaksina ala moda?  En una enjeksyon de unas kuantas gotas de sangre de negro (preto).  Nos parese oyervos gritar de espanto ke vuestro kuero tan blanko no se empreteska kon la enjeksyon de sangre de preto.

      Estavos repozados, vuestra kolor no trokara nulamente, pero por kontra de demi diresh kon este remedyo ke la fyevre amariya venga atakarvos.  Parese ke la sangre de preto no resive una tal fyevre; de ayi el menester de echar en nuestras venas ayudikas de sangre de preto por evitar el atako de una tal fyevre.  Esta kuestyon esta oy al estudyo, i si esta teoria sera konfirmada en la pratika, un tal djenero de vaksina devyendra kesas obligatoryo.


Kontra entosigamyentos:

      Los entosigamyentos en famiya no raros, en vezes, son kreaturas ke engluten fosfores.  Entonses kale darles kada medya ora una kucharika, de las ke empleyan para el kafe, de azete de pelesandro (pelesenk) a kondisyon de darles mas de 5 vezes.

      Afita por neglija de los kovres onde gizan, todos los ke gostaron de este gizado se topan entosigados.  Se konseja en semejante kavzo de bever leche en abondansa o buyido de sevada.

      Por matar ratones, desparesen bokadikos ke kontyenen arsenik.  El arsenik syendo un vyolante tosigo, kualunke se englutaria sin saver o sin kerer de estos bokadikos, se toparia byen mal.  Se konseja en semejante kavzo de bever en prensipyo una syerta kuantidad de agua kon sal.  En despues kontinualmente agua kon magnezya asta ke el enfirmo se syenta konsolado.  Kontra entosigamyento de merkuro (djiva) dan a bever klaras de oivon kon agua.