Make your own free website on Tripod.com
Archivo |
MuestraLingua
El Enstruktor Noš 27
6 Heshvan 5649 - 11 Oktobre, 1888

por Rifat Birmizrahi

ISTORYA DE ENVASYONES I DESKUVYERTAS:


La makina de kalkulo:

      Enel 1841, el savyo Israelita Stern envento la endjenyoza makina de kalkulo ke syerve para azer las kuatro operasyones de la aritmetika (adisyon, sustraksyon, multiplikasyon, divizyon).  Antes de Stern, munchos savyos travajaron por enventar una makina de semejante i no reusheron.  Esta makina fue entitolada la makina de Djudyo.

      Rekontan ke un ensidente avia enspirado a sinyor Stern la idea de enventar esta makina.

      Sinyor Stern avia liido en un jurnal ke un bankero se avia suisidado kreendo ke le mankava una grande suma de la moneda ke era depozitada onde el; ma ke despues de su muerte verifikaron los kuentos i toparon ke el suisidado se avia yerrado.  Sinyor stern tuvo alora la idea de enventar una makina ke no puedia yerrarse nunka en los kuentos.

      Despues de munchos anyos de travajo, el reusho a la fin a enventar esta makina, ma un aksidente falto destruir en un punto todas las esperansas ke el se avia echo.  El avia metido su makina en un karekoche (araba) por mostrarla a su amigo sinyor Steshin.  Ma el kochero desho kayer embasho, por aksidente, la makina ke fue despedasada.  Sinyor Stern se atristo muncho ma no se deskorajo.  El travajo un syerto tyempo i la fraguo de nuevo.  Kuando el la prezento ala akademia de las syensas, todos los savyos le aderesaron las mas kalorozas felisitasyones i rekonosyeron la utilidad de su envasyon.  Sinyor stern envento despues munchas makinas de una grande utilidad por la agrikultura, komo las makinas de segar, de alimpyar i de moler el trigo.

      Este grande savyo rendyo imansos servisyos ala sensya.  Fue sovre su propozisyon ke fue fondada una eskola rabinika en Varshovia, enel 1826.  El fue myembro de la akademia de Varshovia.  El emperador Aleksandro primero le izo una pensyon.

      En esta makina ay una tavla kon 10 numeros.  Un braso ke se muve toka sovre estos numeros.  Ay un lugar ke endika las operasyones.  Tornan un mekanismo i el braso va djuguando sovre los numeros ke endika despues el rezultado bushkado.

      Esta makina fue perfeksyonada despues por otros savyos.  Sinyor Tomas Kalmar envento una otra makina enel 1850 i eya kosta mas barata.  Las kumpanyas de asigurasyon sovre la vida se syerven de esta makina.  Eya fue prezentada por la primera ves al publiko en la ekpozisyon de Shtitin.


La makina de eskrivir:

      Es un Amerikano nonbrado Remington ke envento esta makina ke fue ekpuesta en la ekpozisyon universal de Paris.

      Esta makina es komo una kashika i asemeja a un piano.  Dyentro de la kashika ay un silendro ke va tornandose.  Delantre de la kashika ay un silendro ke va tornandose.  Delantre de la kashika ay 45 botones despartidos en 4 linyas.  Estos botonikos reprezentan las letras del alfabeto, kon los puntos, las virgulas etc.  Kuando keren eskrivir algun byervo no tyenen otro ke tokar sovre los botonikos, sovre las letras menesterozas, djustamente komo tokan los yaveles del piano.  El papel ya se topa dyentro de la kashika i sale estampado.

      Esta makina eskrive mas presto ke el mas abil eskrivano ke no puede eskrivir mas de 25 o 30 byervos al minuto, myentres ke la makina eskrive de 50 a 70, sigun la prestes de los dedos ke deven djugar sovre los botones.  Enel espasyo de tres o kuatro dias pueden aprender a eskrivir kon esta makina de 40 a 50 byervos al momento.  Todo modo de papel puede servir; las letras salen klaras i limpyas.

      Esta makina tyene munchos i emportantes avantajes sovre la pendola.  La eskritura es muy klara, i puede lierse mas fasilmente ke la eskriturya del mas abil kaligrafo.  Eya termina en 5 oras lo ke la pendola demanda 10 oras de tyempo.  El eskrivedor no es ovligado de abokar la kavesa, no sufre de la vista, no se embataka las manos, i puede mesmo azer su echo en la eskuredad, si el es byen abituado a djuguar los dedos sovre los botones.  Pueden eskrivir kon eya viyajando en kamino de fyerro.  Eya es sovre todo muy util para los stenegrafos, los avogados etc. ke pueden kopyar byen presto los dokumentos.  El solo defekto es ke no pueden mashkarear i enderechar un byervo yerrado.

      Topan a merkar de esta makina en Londres i en Paris, al presyo de 300 frankos.  En los ofisyos de los jurnales Times, Observer, Santral news, Daily telegraf i el Estandard se syerven de esta makina.  En Amerika, la mas parte de los tribunales se syerven de eya.


Las kartas de djuguar:

      Dizen ke las kartas de djuguar fueron enventadas en tyempo del rey Karlo 6.  Este prensipe era enfirmo i por divertirlo enventaron este djuguo ke fue espandido despues en todos los paizes.  Otros asiguran ke este djuguo ya egzistia antes de Karlo 6 i ke el enventador seria "Saul" ke bivyo antes de la era Kristiyana, ma ke avia sedo abandonado asta el tyempo de este soverano.

      El pentor Jakmen Gregoner envento unas kartas espesyales ke fueron yamadas kartas Fransezas.  La damma de "Kros" reprezentava la reyna Maria de anjo, mujer de Karlo 7.  La damma de "Karo" era yamada "Rashel", ke era Anise surel; la damma de "Pik" reprezentava la muchacha Juanna de Ark etc.  Los kuatro mansevos (vales) reprezentavan unos eroes de la istorya.  Parese de esto ke el djuguo de kartas era una espesya de djuguo de ajdres (santranch).

      En tyempo de la revolusyon Franseza del 1789 kambiyaron las formas de las kartas.  En lugar de los kuatro reyes metyeron los kuatro elementos de la natura en lugar de las kuatro reynas, las kuatro estasyones del anyo, i en lugar de los kuatro vales katro agrikulturas.