Make your own free website on Tripod.com
Archivo |
MuestraLingua
El Djugueton Nš 1
4 Adar B 5673 - 13 Marso, 1913

por Rifat Birmizrahi

MAUYO:

      Kon la ayuda del Dyo, i kon konkorso de nuestros keridos kollaboradores, vinimos de eskapar la publikasyon de la kuatrena anyada i empesimos esta semana el primer numero de la sinkena.

      Komo todos, el Djugueton tambyen tuvo este anyo munchos empushos, i es kon grandes esfuersos ke pudimos publikar regularmente nuestro jurnal, aunke aki en Konstantinopla nuestra gazeta es byen vista i merkada de todos.  Es por esto ke los sinyores abonados son rogados de pagar en vista sus abonamyento en estos dias ke el rekavdador va salir a rekojer por permetermos a azer nuestro lavoro regular, nos es verguensa de dizir ke para 20 groshes de abonamyento.  Algunos azen muncho ir i vinir al faktor, i el otro anyo, un sinyor abonado, izo ir i vinir al faktor 17 vezes, azyendo kuento ke para vente groshes de abonamyento, se dyo 12 groshes para adovar los kalsados del faktor.

      Komo kada anyo, este anyo tambyen el Djugueton kontinuara su programa, akel de avlar la verdad i hervar lo tuerto, tenemos la firme esperansa ke el onoravle publiko mos akordara komo syempre su yena konfiensa.  Esperamos tambyen ke el savyo rabenu Ribi Yotfata, Asoplado, Budala Ham Zevulun, kererian onorarmos komo syempre de sus kolaborasyon i kon esta esperansa los regrasyamos de antes.

La Direksyon.


EL PRESYO DEL DJUGUETON:

La vida de oy no es la de ayer
Oy es kon empushos, antes era kon tanyer.
Empesamos de la kira de kaza,
Ke nos esta kemando komo braza.
Vyene despues la dela botika,
Mas i mas kuando tenesh patron antika.
El empesa a mauyar ke deve muncho vergi,
I del morador kere kitar todo loke izo yegin.
Ken le disho ke no pagara kada anyo,
Porke no se le izyera la kara de kanyo?
No basta ke los echos se apokaron,
Los gastes muncho nos pujaron.
Tomavamos prasa a dos metalikes,
Oy esta al presyo de alfinikes,
Komiamos pijon de Selanik a syen paras,
A kuatro le pagash, vos manda atras.
La sal era a dos de ventes la oka,
Oy a tres i alevanta fushka la boka.
Es por esta razon verdadera
Ke nos rekojimos en una kaldera
Todos los lavorantes del Djugueton,
Del chiko fina el mas grande patron.
Ke para pueder kitarla i engrandeserla,
Disde oy a vente paras venderla.
La mas grande razon es oltra
Ke los empyegados estan kon mutra.
Vyendo ke los grandes se fueron al askerlik,
Los chikos gritan ke les pujemos el aylik.
Nozotros les damos grande razon,
Porke les pujo el mazon.
Estamos siguros ke todos achetaran,
I uno al otro no se la emprestaran.
I si nozotros reushiremos,
El jurnal engrandeseremos.
Tomad byen de nota,
Ke no somos una bota.
Ke beve agua de naorya,
I ke kome pan i safanorya.