por Rifat Birmizrahi

EL MEDIKO DE LADRONES

      El 12 Septembre 1899, todas las gazetas de Paris eran yenas de artikolos iluzyozos, alavando a un savyo doktor ke el avia topado kon su sensya, el remedyo de no deshar rovar.  Este savyo doktor pretendia ke el rovar es una hazinura komo todas, i ke el avia topado la melezina.

      Ya puedesh kreer la sansasyon ke azia esta novedad, partikularmente sovre la polisiya ke bushkava a enkorajarlo en dandole a azer munchas provas sovre los ladrones ke se topavan en la prezyon.

      Una manyana, el savyo doktor estava estudyando en su kabineto, kuando el moso vino enformarlo ke un sinyor ke vinia kon otomobil, le prezentava esta karta dorada i le rogava de resivirlo.  El doktor echo una ojada sovre la karta i meldo:
"KONDE JORJ DE FILBURG"
Azerlo entrar al salon, disho el doktor.

      Dos puntos se pasavan, el doktor i el kond se apretavan las manos i el aristokrato le dizia:
"Pardon doktor de mi deranjo, los artikolos tan iluzyozos delos jurnales me izyeron vinir onde vos".
Tengo una mujer ladrona, i para un konde komo mi, me esta azyendo el onor de un aspro.  Kero a todo presyo ke la melezinesh.
Vuestra mujer es ladrona!?
Djustamente, i muy ofisiala.
Eya aze los rovos en las kayes?
No sinyor, si esto era yo la uvyera abandonado, eya tyene un maldicho uzo.  Kuando vamos a vijitar a algun lugar eya bushka a rovarse loke topa en medyo.
Este kavzo esta mas kuryozo.
Loke ay de mas etonante es, ke kuando vyene en kaza, eya me entrega todo loke se rovo en rogandome de mandarlo onde su patron i de eskuzarla.
Esto esta mas etonante.  No la mostratesh a ningun mediko?
A munchos.
I ke vos disheron?
Kada uno me dize una koza ke no me entra en idea.
Izitesh bueno de prezentarvos aki, vuestra mujer se puede muy presto melezinar. Eya no tyene ke una ipohondria enternsada en los nyervos.
Grasya doktor, kuanto vos vo pagar?
Deshad la kuestyon dela paga para despues.  Traelda aki, la vere una ves ya vos digo.

      El konde saludo i se fue i medya ora despues el retorno kon su mujer.  Por provar, el konde kon el doktor se metyeron a konversar i por otra parte la mujer empeso a rodear la kamareta.  Eya vido ensima del boron una ora i un kostek, se lo guadro.  Vido mas aya un enstrumento de plata lo guadro.  Avryo el kashon del boron vido un pako de djoyas i akel tambyen lo guadro i en kada koza, el marido mostrava al doktor el rovo ke su mujer azia.

      El rovo eskapado, el mediko egzamino ala mujer i disho de nuevo, eya se pude melezinar.  Eyos saludaron i el konde le disho al doktor:
Mandad al moso al otel de Prens le dare las kozas rovadas.  El konde se va i medya ora despues, kuando el moso del doktor iva a bushkar el konde, no topava a ningunos, retornava kon los mokos enkolgando i el bravo doktor entendia ke la kura ke avia topado le avia kostado muy karo.