Make your own free website on Tripod.com
Archivo |
MuestraLingua
El Burlon Nş 23
5 Sivan 5669 - 27 Mayo, 1909

por Rifat Birmizrahi

EL HAREM DE ABDULHAMID

      Ya se save ke el vyejo sultan le plazia muncho i tenia muchas mujeres.  Su harem era grande kuanto un kuartel de sivdad.  El tenia serka 500 mujeres.  Estas se despartian en munchas klasas:
Avia las kadines i prensesas, las djaries, las gözdes, (kere dizir ke harvaron en ojos del rey) las ikbales (ke tuvyeron la onor de estar kon el rey) i las helakes (esklavas de sigundo rango). Enriva de todas estas ay la valide hanum, ke es el kapo del harem.

      Kada kadin okupava un daire o apartamento partikular.  Eya tenia muchas empyegadas ke se okupavan de diversas fonksyones.  Avia la haznedar usta, la bash katip, la muhurdar, la esvapchi bashi etc.  Una kadin no puediya nunka i basho ningun achake salir del saray emperyal.  Por kontra las djaries ke no tuvyeron ijos, el vyejo sultan tirano las regalava envezes a un grande personaje. Munchas vezes Abdulhamid no azia este regalo ke por desbarasarse de una mujer ke no le plazia mas o por la kuala el empesava a tener sospecho.

      En vezes, tambyen la mujer dada ansi a algun personaje era kargada de inchir una terivle misyon serka del ombre donde eya se azia la mujer.  Por eshemplo el Hodja Seyfettin efendi, uno de los ombres del kual Abdulhamid se espantava lo mas, resivyo de su parte una admiravle esklava, muy ermoza: syendo el la amo tanto, i fuetanto amado de eya ke el muryo de esto..

      Munchas vezes tambyen, estas mujeres despartidas en los haremes delos personajes sospechozos eran kargadas de una suzya ovra: El espiyonaje.  Myentres los echos armenos estas mujeres espiyones rendyeron grandes servisyos al sultan kolorado.  En el palasyo tambyen eyas son ovligadas de egzersar el espiyonaje.

      Ansi un dia Abdulhamid avyendo visto una joven esklava ke lavava las ridas de su patrona, una grande prensesa, se entrendo en kapricho por eya, el la izo trayer a sus apartamentos partikulares..  Despues del plazer vyene syempre dezeo de konversar.

      Abdulhamid prometyo a su nueva amiga de azerla una grande prensesa, a kondisyon ke eya deskuvyera los penseryos de su maestra.  La esklava seya de espanto, seya a kavza de la prometa deskuvryo a Abdulhamid ke su maestra lo topava a el muy aedado i enkapache de amor.  El vyejo sultan plaso a la joven esklava mas ariva de su maestra i esta ultima fue abnadonada.

      Grasyas a los akavidos tomados por Abdulhamid, era emposivle a sus mujeres de tener la mas chika relasyon kon la djente de afuera del palasyo.  Enseradas en el dobyo rango de altas i espesas murayas, las mujeres del saray bivian en un mundo onde ningun ombre afuera del vyejo sultan puedia entrar.

      Abdulhamid preferava las mujeres chikas i grasyozas i no akeyas de una ermozura majestuoza.  Sus djaries no lo amavan, pero se espantavan de el.  Las dammas del harem del vyejo sultan pasavan todo el tyempo a baylar a la Turka lo ke plazia muncho al "sultan kolorado", i a engleneyarsen komo kreaturas kon kuklas, djuguetes etc.  Eyas se divertian a imitar los gritos de las bestyas, el kante del gayo, el mauyo del perro.