Make your own free website on Tripod.com
Archivo |
MuestraLingua
El Sutan i El Haham

por Avram Gamliel

      El Sultan 1 , tenia munchos mosos, avokatos, doktores, hahames i savyos, en su sarray 2 .  Todos eran konsiderados komo "La crème de la crème" 3 i kada uno i uno kon su vazife 4 .  El Hahambashi 5 , Elias era konosido por toda la komunidad djudiya i turka, era tanbien el mas konosido i mas kapache del sarray.  El Sultan, kuando lo yamava al Vizir 6 , demandandole si lo ke entendyo del Haham era un paso bien i djusto.  El Vizir le dizia:  "Kualo keres ke te diga?  Elias - El Haham, es una persona muy onesta, ke todo lo ke te dize, siempre tiene razon".  El Vizir ya se enselava un poko de el, ma no era su dover 7 de kitarlo del buen echo ke le aziya al Sultan i meterse el mizmo en su lugar.  I el Sultan, ya no dava dingun karar 8 o paso sin ke Elias el Haham le dezia su idea i sin su akordo.

      Entro viernes, el Sultan yamo al Vizir dandole orden ke trayga al Haham.  El Vizir sin piedrer tiempo, lo yamo al Haham Elias diziendole:  "Musyu Elias, el Sultan, te keriya avlar".  Ya le dyo bake 9 al Haham, se pensava el:  "Ke koza es ke ize ke no le plazyo?".  Pishin 10 , el Vizir kon el Haham entraron al sarray, verlo al Sultan.  El Sultan le disho al Haham:  "Asentate!", i sigyendo le dize a Elias, ke de oy en delantre se ivan a azer amigos ke no ay komo eyos.  Le dize el Sultan:  "Todos los sikintis 11 ke vas a tener, so yo el ke te ayudara a solusionarlos!"  El Haham, ya no supo kualo dizirle, tomandole su mano derecha, i bezandola, en remersyandolo 12 muncho,
teshekkürler
13 !

      De akel diya, el Sultan kon el Haham se saludavan kada dia ke se viyan, trokavan ideas i se ayudavan.  Kuando le faltava paras a Elias para pagar su emprestado, el Sultan le ayudava en dandole liras de oro para ke se las gaste o page sus devdas.  Kada ves ke avia un bayram 14 , sin Elias, no era bayram.  Kuando le nasyo un ijo al Haham, el dyo ni un paso sin envitarlo al Sultan.  El Sultan izo una fiesta ke todos en el pais no se lo olvidaron asta oy.  I verdad, se iziyeron dos amigos muy finos i estimados ke ya no se kere ni dicho.

      Paso de esto unos kuantos anyos.  Era diya de alhad serka de mued de Shavuot i el Sultan lo ve a Elias el Haham kon la kara abokada i mirando en basho.  "Ke haber 15 Elias?", le disho el Sultan.  Elias, le dize ke todo ya esta muy bien, ama ya sentyo ke una koza va mal.  Al lunes, el Sultan lo ve, de mizmo, martes lo mizmo i a la fin le dize:  "Deke tienes la kavesa por abasho?  Dizeme lo ke se pasa kon ti.  Si es koza, podre ayudarte?"  El Haham, no tuvo remedyo i komo ya eran unos amigos muy buenos, le dize:  "Ya es djusto ke me sikileo 16 , tengo munchas kozas en mi kavesa ke no puedo ni kontartelas!".  El Sultan le dize:  "Bar Minnam 17 ,!  Kardesh,
Kardesh
18 !  achakes ke somos mas ke amigos, tu bela 19 , es mi bela! me dizes los kudyos 20 ke tienes inshalla 21 todo se va azer bien. Ya puedo asegurartelo".

      El Haham, kuando mas no tuvo remedyo, le disho: "Allah Allah 22 , kualo keres ke te diga, ya konoses mis dos ijos"?  Si ya los konosko le dize el Sultan, ma dainda no le disho lo ke pensava.  Si es ke no tienes las paras para ke se vaygan a estudiar, te las do yo! le disho el Sultan.  Paso martes, yego mierkoles, el Sultan lo ve a Elias kon la mizma kara por abasho i kada ves ke lo ve, esta mas eskaido 23 !  El Sultan le prometyo todo lo ke kere para ayudarle.  Elias le dize: "Me disho el behor 24 ,
Baba
25 !  Me vo azer un ladron",  Entra djugueves, Elias le dize al Sultan:  "Mi ijo, el chiko me dize ke se va azer un kuchiyador".  Komo kerras ke no tenga la kavesa embrujada 26 i por abasho tenyendo estos kudyos?  El Sultan lo entendyo, ama no supo ke dezirle.  "Tienes razon Elias, komo de ijos un padre podra tener?"  El Sultan le respondyo.  Ama siempre ni el uno ni el otro supieron komo solusionar este maldicho bilmedje 27 i enderechar esta situasyon.

      Elias paso el dia de Shavuot kon todos en el kal 28 i despues del kal, toda la djente salyeron a fiestar, salyeron por las kayes paseando, kantando i baylando.

      Pasaron otras kuantas semanas de esto, ya ampesaron kon Selihot, Rosh Ashana se aserkava.  El Sultan lo ve a Elias kaminando por la kaye, pensando ke dainda la tuvyera la kara por enbasho, halbuki 29 lo ve kon una kara ke la tiene kon un aire riyendo i le da un isharet 30 ke se aserke.  Kuando ya se aserko, le dize el Sultan:  "Kuala desizyon tomates kon la kestyon de tus ijos?  Syendo un haham, no podias tener idea?"  Elias le dize:  "Kualo ke te diga!  Kuantas noches ke no durmimos ni yo, ni Sara mi mujer, ya pensimos muncho de esto".  Povereto Elias, le dize el Sultan.  Elias, riendose le dize al Sultan:  "Ya se ke me konoses komo un haham 31 ".  Sigyendo, le dize: "El behor me disho ke iva azerse un ladron, el chiko keriya azerse un kuchiador,  Ya me entro un pensamiento por lo ke me keriyan dezir mis ijos, no puediyan ser kozas tantas negras 32 ".

      Si una persona tiene mahkeme 33 , le dize Elias.  I si devia defenderse, ya tuviera ke gastar un alay 34 de paras.
El Sultan le dize:  "Esto es lo ke yamas ladron?"
Si una persona esta hazino, se va a la hastane
35 , los doktores lo van a sanar.
El Sultan le dize:  "Esto es lo ke yamas kuchiador?"
Egsakto!  Le dize Elias.

      El Sultan ........ Ah!  No vos dishe ke tenia dos ijas, mansevikas i muy ermozikas, i si ........ se las prometyo a los ijos de Elias.  El Sultan ya no era tan tonto.  A mi no me lo disheron esto, ama ya lo se ke kuando un avokato se va a defender uno de sus klientes i komo el kliente kere salir limpio de la mahkeme, le promete tanto i tanto de moneda, metiendosela a su aldikera 36 mizmo ke no ganava en el djuzgo, no se yama esto un ladron?  Otra koza ke todos lo savemos, kuando un djerrah 37 en la hastane tiene un hazino 38 ke deve operarse, mizmo si el djerrah izo todo de su pueder para salvarlo a este hazino, mizmo ke la operasyon no reusho i el hazino se muere, no se yama esto un kuchiador?

      Rosh Ashana, este anyo kaye en viernes.  Djugueves ya era un dia de fiesta.  El Sultan las kazo a sus dos ijas kon los dos ijos del Haham, ya tuvieron una boda muy grande por toda la sivdad i el pais, mandaron envitasyones a TODOS .  A mi no me envitaron i es koza de enselarme.  Yo ni ke me enseli porke todos estuvieron en esta boda i yo no!  Lo savesh deke?  Kuando me paryo mi madre, era Rosh Ashana, es el dia ke nasi yo!  Aun ke era el dia despues de sus kazamyentos de los ijos de Elias el Haham i las ijas del Sultan.


Los byervos ke son zor 39 (para entenderlos)

  1. Turkish Ruler, Sultan
  2. Palace
  3. The ultimate, The best of the best
  4. job, duty
  5. Head/Chief Rabbi
  6. Vizier
  7. duty
  8. decision
  9. high heart beat, elevated pulse rate
  10. immediately, right away
  11. uneasy feelings, worries
  12. thanking him
  13. Thanks
  14. Holiday, Festive Day
  15. news, what's new?
  16. worried
  17. God forbid
  18. in a brotherly manner
  19. trouble, problem, mischief
  20. things let in charge, worries
  21. with God's help
  22. my God!/don't ask!/I don't believe it!
  23. down, feeling down, depressed
  24. 1st born son
  25. Father!
  26. mixed-up, confuesd
  27. puzzle
  28. Synagogue
  29. but, furthermore, to be said
  30. signal, sign
  31. smart, smart guy
  32. bad (plural)
  33. courthouse, court, lawsuit
  34. a lot, many
  35. hospital, clinic
  36. pocket
  37. surgeon
  38. ill, sick, infirm
  39. difficult, hard