Make your own free website on Tripod.com
Archivo |
MuestraLingua
REKUERDOS DE ROSHASHANA

por Rachel Amado Bortnick

En mi chikez en Izmir, Turkiya, las preparasyones para Los Muadim (Roshana i Kipur) empesavan a lo menos de un mez de antes, trayendo un ayre de guezmos limpyos a la kaza, i un sentimyento i entuziasmo espesyal a la famiya, sovre todo a las kriyaturas.

El manseviko vizino de allado, David Israel (agora es hazan en la keila Bet Israel de Izmir), empesava a pratikar tanyer el shofar en el terrado de su kaza. Kuando lo sintiya yo, me se tomava el reflo, esperando a ver si su reflo le iva abastar a kitar todas las notas a sigun se deve.

En la kaza se goliya los guezmos de shavon, amonyak i vinagre de las limpyezas ke se aziya, i guezmo de naftalin tanbien, de los tapetes ke se estiravan en basho despues de estar guadrados el enverano entero kon milizina kontra las puliyas.

Los grandes de kaza se empesavan a levantar a medya noche para irsen a los silihot, las orasyones tradisyonal para demandar pardon del Dio.

Para las kriyaturas se aziya vistimyentas muevas. La shastra veniya a kaza un diya, i kitava de metros de ropa, fostanes i vistidos ermozos. En kortando la ropa, se diziya “kon salu(d)”, para dezear ke el se lo va vistir se lo vista kon salud buena. Si komo mi aniversaryo es tres diyas antes de roshashana, a mi se dezeava “munchos anyos i buenos” i “novya ke te veygamos.”

El vistido de mi ermano se dava a kuzir al shastre en la butika de ropas de mi papu, ke era en el charshi.

Las mujeres aziyan los dulses, komo sharope i dulse de bimbriyo, para adulsar a la djente ke ivan a vinir a vijitar. Todos los dulses de Roshashana devian de ser blankos o de kolores klaras, simbolizando alegria pra el anyo vinidero. Mi mama era mestra (experta) de azer mogados de almentra (ke otros lo yaman masapan.) Mezmo la baklava echa para esta fiesta se aziya de almedra blankeyada, porke era mas klara de muez ke se uzava en el resto del anyo.

La kumida de erev rosh ashana (noche de mued) era muy alegre, kon munchos de la famiya - tios, tias, i suvrinos - ke viniyoan a fiestar kon mozotros. En la meza kuvrida de bogo blanko de lino brodado, se metiya asukar a lugar de sal, i dulse de mansana, para ke el anyo muevo seya dulse. La kumida empesava kon los yehiratsones, las bendisyones kon sus simboles en las diversas fritadas, komo de prasa, kalavasa i espinaka. I siempre aviya pishkado kon la kavesa, para ke seygamos “siempre de la kavesera i nunka de la kola” (siempre ke mos vaygamos para adelantre i nunka para atras.)

El dia de Roshashana, la demaniana kuando saliyan los ombres del kal, aviya un dezayuno grande, kon boyos, burekas, guevos haminados, fritadas, i frutas. Despues empesavan las vijitas rituales a toda la paryentés,i todos los amigos i konosidos.

Los ombres se ivan kon los chikos, i las mujeres kedavan en kaza para resivir a los vijitadores. Se tokavan manos de parte a parte, en dezeyandosen “Tizku Leshanim Rabot” (Hebreo) , o “bon fète” (Fransez), o “anyada buena”. Al musafir en primero se sirviya sharope (dulse blanko para ke syga todo klaro i alegre en el anyo muevo) ke se trayiya en la tavla de plata ke kontenia tanbien la kucharera, i vazos de agua. Despues de unos kuantos minutos, se adulsava mogados o marunchinos. (Me parase ke marunchinos es una spesialita de Izmir solo. Es lo ke se yama “almond macaroons” en Inglez.) Siguro ke antes de tomar dingun dulse, el musafir diziya sus dezeos de “Anyada buena i dulse” i otras dichas para ke se aga todo bueno en la anyada mueva.

Kada vijita turava menos de medya ora. I despues se iva a otra kaza para azerles la vijita.

Lo mas de los Djudios moravan en la parte de la sivda ande moravamos mozotros, ke es por Karatash, serka de la keila grande Bet Israel, i por esto todos se ivan a pied de un lugar al otro.

Siguro ke era verguensa refuzar de tomar dulse kuando se ofriyiya en las vijitas, ma no era posible komer tanto dulse en un diya. Por esto, los ombres tomavan los mogados i maronchinos i se los metiyan en una riza blanka i limpya espesyal para esto, i se los metiyan en la aldikera. Despues de tres-kuatro vijitas era menester de aboltar a kaza, no solo para repozar un poko, ma tanbuen para vazyar las aldukeras antes de kontinuar las vijitas i inchirlas de muevo.

Todos estavan alegres. Las kriyaturas resiviyan bastante abrasos i bezos de los keridos, vizinos i konosidos. El sol ke briyava en el syelo paresiya komo ke estava alegre i kontente komo mozotros. Ma mas de todo me akodro ke Rosh-ashanah en Turkiya mos adjuntava a todos kon un sentimyento de ermandad, de keremos bien de uno a otro, i de orgulyo i alegriya en muestro Djudaismo.

Tizku Leshanim Rabot. Anyada buena i alegre a todos.