Make your own free website on Tripod.com
Archivo |
MuestraLingua
O, MADRE KERIDA

Matilda Koén-Sarano - Yerushaláyim, Mayo 1998

O Madre Kerida

O, madre kerida,
Tú me parites kon dolor
I toda tu vida
Tú me kudiates kon amor.
El pan te kitas de la boka,
Para ke ambierto no me kede yo.
De ti te kitas la kuvierta,
Para ke tenga siempre yo kalor.

Es sólo en kresiendo
Ke konosí yo tu valor,
Porké yo sto viendo
K’en mí metites un trezor.
Lo ke de ti tú me dates
Nunka en mí enfasar se va
I adientro de mi alma
Por toda mi vida kedará.

O, madre kerida,
Tu nombre ‘s komo un’orasión,
En l’ora mas dura
Es el ke sal’ del korasón.
Azeme ver la esperansa
Ke sta en tu inmenso amor,
I dame koraje i fuersa
Para kreyer sólo en lo mijor.

De la fin del mundo
Tornar vo siempre onde ti,
I todas mis djoyas
Kon ti yo kero despartir.
De onde stas protéjame
I manda a mí tu bindisión,
I a todos mis males
Toparé yo konsolasión.

O, madre kerida,
O, madre!