Make your own free website on Tripod.com
Archivo |
MuestraLingua
EL KAZAMENTERO

por Moshe Shaul

      Para los sefaradis de muestros dias, muy bien integrados en las sosiedad oksidentala moderna, el kazamiento es, en la mayoria de los kavzos, una koza a desidir en primer lugar entre el ombre i la mujer ke se aman i keren kazarsen.  El konsentimiento de sus famiyas respektivas viene solo en segundo lugar.

      Ma en la sosiedad sefaradi tradisionala de asta los prinsipios del siglo 20 la situasion era muy diferente.  Ayi los kazamientos eran areglados kaje siempre por los djenitores, a vezes solos i a vezes kon el ayudo de un kazamentero, o mijor ainda, una kazamentera.

      Avia famiyas ke se prometian mutualmente de kazar el ijo de la una kon la ija de la otra kuando eran ainda chikos, ma en la mayoria de los kavzos es solo kuando la ija ya avia alkansado su pubertad ke los djenitores empesavan a bushkarle novio.  Naturalmente, kon el tiempo i a mizura ke se enfuertesio la influensa de la kultura oksidentala, la edad del kazamiento fue adelantando; ma aun kon esto, mizmo a prinsipios del siglo 20 la ija ke no estava kazada a la edad de 18-20 anyos ya era una kavza de preokupasion para su famiya i entonses es kuando se bushkava el ayudo de los kazamenteros.

      Avia en primer lugar los ke azian esto simplemente por “mitsva”, komo una buena aksion ke pujaria sus meritos.  Kaje siempre eran mujeres, amas de kaza ke konosian bien a munchas famiyas i savian ken tenia “ija para kazar”, ken estava bushkando un “buen partido” para su ijo o su ija, i sovre todo ke era la situasion sosiala i finansaria de kada famiya, afin de poder akomodar sus demandas respektivas.

      Ya se save en efekto ke para los sefaradis ke bushkavan a kazar sus ijos o ijas era muy importante ke el kandidato sea “de buena famiya”, segun lo apunto en su autobiografia el Premio Nobel de Literatura, el sefaradi Elias Canetti, kontando komo su madre era orgolioza de vinir de una buena famiya, en komparasion kon la famiya de su padre.  No menos importante era la situasion finansaria de las dos famiyas, sovre todo de la famiya de la futura mujer, ke devia dar al futuro marido, a la ora del kazamiento, una dota ke su valor era fiksada segun la situasion sosiala de la famiya del novio, por enshemplo, si se tratava de una famiya de rabinos o lideres de la komunidad, etc.

      Ma kuando los esforsos de los kazamenteros voluntarios no davan rezultados i ke los anyos pasavan, se tenia rekorso a los kazamenteros profesionales, ke se azian pagar es verdad, ma eran kapaches de areglar kazamientos mizmo en los kavzos mas difisiles.

      Estos eran personas ke konosian a todas las famiyas de la komunidad i a vezes de otras komunidades i sivdades tambien i savian muy bien ken i ken tenia ijo o ija para kazar.  En desparte de esto eyos eran tambien buenos diplomates i lo ke oy yamariamos “ekspertos en publisidad”

      Eyos savian azer sovresalir las kalidades de las dos partes i tapar o minimizar sus defektos.  Eyos eran tambien maestros en el arte de konvenser, de reglar konfliktos i diferensias entre las famiyas, enfin superar todas las difikultades ke se enfrentava asta yegar al momento en el kual las dos partes se metian de akordo sovre las kondisiones del kazamiento i ke, en prezensia del rabino se azia la seremonia del despozorio.  En muestros dias, aun ke ainda se puede topar, aki o ayi, kazamenteros voluntarios ke bushkan a areglar kazamientos entre la djente ke konosen, la figura del kazamentero profesional tal ke existia en las komunidades sefaradis de los siglos pasados, ya desparesio kaje kompletamente.

      El kazamentero ya no es mas ke un rekuerdo, una de las figuras mas interesantes del folklor sefaradi ke, a dizir la verdad, podia ser vista en otras komunidades djudias tambien onde kumplia las mizmas funksiones, i ay numerozas anekdotas a sus sujeto, una de las kualas, ke traemos a kontinuasion, ilustra muy bien lo ke dishimos sovre sus kapachidad de persuazion.

      Yaakov estava bushkando novia desde bastante tiempo i no topando lo ke dezeava el se adreso a un kazamentero.

      Este le aseguro ke tenia djustamente un partido eksepsional, una mujer kumplida de todos los puntos de vista ke no mankaria de akontentar todas sus demandas i el les areglo una entrevista para unos kuantos dias despues.

      Vino el dia de la entrevista i Yaakov se enkontro kon la mujer ke le avia sido tanto alavada.  Al salir del enkontro el kazamentero le demanda:

  • E bien, komo se paso la entrevista? Te agrado?
  • No entiendo – respondio Yaakov – dishites ke es una mujer kumplida ma veo ke es tartamuda!
  • Ah...Esto no es nada....Esto es mizmo un avantaje.  Ansina avlara manko i no te atagantara kon sus avlastinas.
  • Eya es tambien media sodra.
  • Ainda mijor!  Ansina no piedrera oras enteras avlando kon las vizinas.
  • Ma, eya es tambien kosha!
  • E kualo keres?  Entre tantas kualidades ya puede tener i un chiko defekto komo a este...